Англија втор пат по ред е финалист на ЕП.
Избраниците на Герет Саутгејт во полуфиналето ја совладаа Холандија со 2:1 и изборија средба со Шпанија за трофејот европски шампион.
Холанѓаните рано поведоа со прекрасниот гол на Чави Симонс, но Хари Кејн брзо одговори од белата точка.
Кога се чинеше дека натпреварот ќе оди во продолженија, се појави Оли Воткинс кој погоди во 90. минута.
Кејн го започна пресвртот на Англија за да го постигне својот трет гол на турнирот. Исто толку голови како и ѕвездата на Баерн Минхен постигнаа и Шпанецот Дани Олмо и Грузиецот Жорж Микаутадзе, Германецот Џамал Мусиала, Холанѓанецот Коди Гакпо и Словакот Иван Шранц.
Така Кејн стигна до бројката од девет гола во нокаут-фазата на големите натпреварувања, односно светските и европските првенства и затоа стигна до самиот врв на историската листа.
Ниту еден Европеец во историјата нема постигнато девет гола во нокаут фазата на двете натпреварувања, а Кејн (30) може да го освои првиот трофеј во кариерата во финалето против Шпанија в недела.
