Да, кошаркарскиот тренер Жељко Обрадовиќ доби пиво во негова чест во својот роден град.
Најтрофејниот тренер во европската кошарка, Србинот Жељко Обрадовиќ, после сите трофеи во својата богата колекција сега ќе може да се пофали и дека има свое пиво.
Од неговиот роден град Чачак стигнува интересна вест дека во кафичот Жоц, именуван токму по прекарот на Обрадовиќ, ќе се точи и истоименото пиво.
„Жељко секогаш знаел да им помогне на своите стари другари. Ниту 40-те титули освоени ширум Европа и светот не застанаа на патот на другарството од младоста. Жељко знае дека има своја екипа, на чија цврста одбрана може да се потпре при секој животен предизвик. Токму таа екипа му доделува уште една титула, онаа за вистинско пријателство. Такво е и ова пиво, во негова чест, а за гостите на Жоц кафе, за уживање“, вели Александар Дениќ, еден од сопствениците.
Обрадовиќ во својата тренерска кариера ги предводеше Партизан, Жувентуд, Реал Мадрид, Тревизо и Панатинаикос, а од 2013 е во Фенербахче. Има освоено 9 титули шампион на Евролигата, 11 пати шампион на Грција, 7 Грчки купа, 4 пати шампион на Турција, 3 Турски купа, 3 Турски Суперкупа, 2 пати ФИБА Сапорта куп, 2 пати Мадридски куп, 1 Италијански Суперкуп, 1 шампион на Каталонија, 1 шампион на Југославија, 1 Југословенски куп, 1 Гомељски куп, како и еден куп индивидуални награди меѓу кои и 2 пати ФИБА европски тренер на годината и 3 пати Евролига тренер на годината.