Лион денеска нема да го игра планираниот натпревар на гости кај Лорјан и тоа поради бизарна причина - тревникот на стадионот е прилично оштетен поради музички фестивал.
Од 6 до 11 август на стадионот „Ду Мистоар - Ив Аленмат“ во градот Лорјан во Бретања, Северозападна Франција, се одржуваше музичкиот настан Festival Interceltique de Lorient чии последици денеска одложија натпревар од најдобрата француска лига. Гигантот Лион требаше да ги одмери силите со локалниот тим на Лорјан од 13 часот, но натпреварот мораше да биде одложен откако гостите на фестивалот ја уништиле тревата на стадионот.
Иако тревникот бил покриен со церата, стотиците луѓе кои се движеле и скокале за време на фестивалот му нанеле огромна штета која Лорјан до денот на одигрување на натпреварот не успеал да ја санира. Додатен проблем претставува и сушата која ја зафати Франција.
Во Лион се гневни што домаќинот не го поправил тревникот, за што имал три дена, и што не обезбедил друг стадион за одигрување на натпреварот кој сега ќе биде дополнително сместен во некој друг термин во и онака згуснатиот распоред.
„Олимпик Лион жали што Лорјан не направи с што е можно за да го спречи ваквиот развој на настаните - кој изгледаше неизбрежен со оглед на моменталната ситуација - со тоа што побара одложување од Комисијата за натпреварување при ЛФП. Олимпик Лион ќе остане внимателен во врска со презакажувањето на овој натпревар од 2. коло од Лиг 1, што може сериозно да влијае на календарот“, објави Лион.
Festival Interceltique de Lorient е традиционален фестивал кој ја слави келтската култура, на која припаѓаат и етничките Бретонци кои живеат во овој дел на Франција и кои говорат свој јазик. Освен на стадионот во Лорјан, фестивалот се одржува и на разни локации низ градот.