Навивачите на Челси беа возбудени кога во 2018 година тогаш 23-годишниот Кепа Арисабалага потпиша за нивниот клуб. Две години подоцна едвај чекаат да си замине.
Двете години на Кепа во Лондон ги обележаа низа киксови и еден голем скандал.
Баскискиот голман го привлече вниманието на светската фудбалска јавност со караницата со тренерот Маурицио Сари кога одби да биде заменет во финалето од ФА Купот против Манчестер Сити. При крајот Сари сакаше помеѓу стативите да го стави Вили Кабажеро, аргентинскиот специјалист за пенали, но Кепа инсистираше тој да брани во пенал-рулетот. Не му помогна ниту тоа што одбрани два пенала и му ја донесе титулата на Челси.
Сѐ што правеше Кепа по тој инцидент беше под лупа на јавноста. Сите киксови кои пред финалето беа заборавани, испливаа на површина, а ни самниот Баскиец не направи ништо за навивачите да му простат.
Напротив, Кепа бранеше сѐ полошо и полошо, а синоќа уште еднаш ја демонстрираше својата неумешност.
На дуелот со Брајтон прими гол кој и просечен голман би го одбранил. Леандро Тросар упати удар од дваесетина метри, Кепа се фрли, но топката мина под него и заврши во мрежата.
Иако Кепа со своите 186 сантиметри е под денешната просечна голманска висина, па разбирливо не се снаоѓа најдобро при нафрлени топки, сепак тоа не е неговата најслаба особина.
Ударите од далечина се неговата Ахилова пета, а статистиката тоа и го потврдува.
Откако дојде во Челси во август 2018, ниту еден голман во Премиер лигата не примил повеќе голови надвор од шестнаесетникот од Баскиецот, дури 19. Освен тоа, во 96 натпревари за Челси во сите натпреварувања прими 110 голови, а само 33 пати ја зачува мрежата незатресена.
Но, особено поразителна е неговата статистика во последно време. Од последните 13 удари во рамките на голот прими дури 9 голови. Во превод: одбранил само 31% од ударите!
Да звучи уште полошо за Челси, Кепа е најскапо платениот голман во историјата. Челси на Атлетик му искешира дури 80 милиони евра и тоа е она што највеќе ги погодува навивачите на „Сините“. Да биде работата уште полоша, истото лето Ливерпул го донесе Алисон од Рома и го плати 18 милиони евра помалку. Алисон се покажа како вонсериски голман, а Кепа разочарување.
По синоќешниот дуел со Брајтон, стартегот Френк Лампард застана во одбрана на Кепа: „Среќен сум со Кепа. Тој е овде, наш голман е и среќен сум што е тука“.
И никој не му поверува.
А и зошто би му верувал кога Челси јавно бараше купец за Кепа. Купец кој не го најде и прашање дали допрва ќе го најде.
