Кер: Видов српски кошаркари како плачат, се чувствував ужасно

Селекторот на Соединетите Американски Држави, Стив Кер, даде изјава по синоќешната луда партија во која неговите кошаркари ја победија Србија со 95:91 и се пласираа во финалето на Олимписките игри.

„Беа брилијантни, чест ми е што бев дел од овој натпревар. Ова беше еден од најдобрите натпревари во мојот живот. Им кажав на нашите тренери дека ова ќе биде најтешкиот натпревар на турнирот, го очекував токму ова. Србија е многу добар тим, добро е воидена. Никого не е лесно да се победи трипати по ред за краток временски период, а ние претходно двапати ги добивме и притоа немаше неизвесност. Го мразев тоа затоа што чувствував дека сега ќе биде многу тешко“, рече Кер.

Повеќекратниот освојувач на НБА лигата со Голден Стејт Вориорс истакна дека Србија одиграла перфектен натпревар.

„Среќен сум што победивме. Видов некои српски играчи како плачат по натпреварот. Се чувствував ужасно бидејќи направија сѐ, играа прекрасна кошарка. Секако дека бев загрижен за можен пораз. Бев загрижен цела вечер и цел натпревар. Никола Јокиќ е најдобриот кошаркар во светот, а српската репрезентација секогаш знае како да одигра. Оваа нивна екипа шутерски не е најдобра ако ја споредиме со претходните. Меѓутоа, им требаа тројки и ги погодуваа. Ми се чинеше дека секој пат погодуваат важен шут. Имавме доволно време да се вратиме и да победиме. Сепак, беше тешко, тие беа неверојатни“, порача американскиот стратег.

Да потсетиме Србија водеше речиси цел натпревар, но на крајот САД одиграа фантастични последни 10 минути и стигнаа до победа вредна за финалето, каде ќе играат против домаќинот Франција.

Од друга страна, Србија ќе се бори за бронза против Германија.