Играчот на Милан проговори за тоа што кажал Швеѓанецот после дебаклот во миланското дерби.
Фудбалерите на Милан едвај чекаа судијата да отсвири крај во неделата на Дербито дела Мадонина. Губеа со убедливи 3:0 од лутиот градски ривал Интер со една игра која не покажуваше надеж дека нешто можат да променат.
Златан Ибрахимовиќ требаше да биде главното оружје на „Росонерите“, но остана без муниција, со едвај една полушанса. Во второто полувреме беше и заменет.
По натпреварот само на кратко им се обратил на соиграчите во една потиштена атмосфера во црвено-црната соблекувална на „Џузепе Меаца“.
Краткиот говор на Ибра на јавноста ѝ го откри играчот од средниот ред Франк Кесие, кој е репрезентативец на Брегот на Слоновата Коска.
„Ни рече дека фудбалот е таков. Кога губите боли, но мора да ги исправиме главите и да бидеме силни бидејќи има уште многу натпревари до крајот“. Тоа е сѐ што кажал Ибра.
Милан е на 2. место во Серија А со 49 бода, 4 помалку од лидерот Интер и 4 повеќе од третопласираниот Јувентус.