Откако пред неколку дена антикорупциската комисија покрена истрага во врска со закупот на салата „Кале“, а против советникот за спорт во Владата Даниел Димевски кој всушност е поранешен претседател на КФМ, Кошаркарската федерација преку соопштение на својата официјална веб-страница излезе со соопштение во кое ја информира јавноста околу стопанисувањето со Спортско рекреативниот центар „Кале“ во Скопје.
„Пред сè, да изразиме сериозна загриженост поради пренесените информации поврзани со стопанисувањето на спортскиот објект при Спортско рекреативниот центар „Кале“ во Скопје. Во оваа прилика сакаме да испратиме демант до сите загрижени за функционирањето на Кошаркарската федерација, особено оној дел поврзан со инфраструктурата. Точно е дека федерацијата, со посебна одлука на Владата на РСМ, го доби во свое владение објектот означен како спортска сала при СРЦ „Кале“, односно големата сала при Спортскиот центар „Кале“ во Скопје (СРЦ Кале 1)“.
КФМ објави и доколумент од Службен весник со кој Владата го дава објектот на трајно користење на Федерацијата.
„Веруваме дека сето ова ви е доволен доказ за чесното функционирање на Кошаркарската федерација која во овој случај, со кој немаме никакви допирни точки, е крајно злоупотребена со изнесените дезинформации во јавноста. Апелираме до одредени структури, кои го користат моментот да се јават со разно-разни конструкции, да не нè внесуваат нас во своите криминални игри. Во една ваква, вонредна ситуација, во која пред сè, треба да се грижиме за некои други, многу поважни работи, над сè здравјето на луѓето, вклучително и кошаркарските клубови, спортските работници, играчите, во најмала рака е несериозно да се изнесуваат невистини поврзани со работата на федерацијата“, стои во соопштението на КФМ.