Деветнаесетгодишниот хакер и специјалист за IT безбедност Давид Коломбо тврди дека има контрола над повеќе од 25 електрични автомобили на Tesla.
Коломбо е млад човек од Германија кој сака да основа своја компанија за сајбер безбедност за да се обиде да го промени светот. Тој тврди дека нашол слаба точка која му овозможила целосна контрола врз автомобилите на Tesla во 13 различни земји.
Во објава на Twitter, тој откри дека користел API клучеви и софтвер од трета страна за да добие пристап до возилата, но тоа не го сторил поради „слабост“ во софтверската инфраструктура на Tesla. Тој објасни дека всушност сопствениците на автомобилите се виновни за неговиот успех, а не Tesla.
Исто така, Коломбо објасни дека нема контрола врз управувањето и забрзувањето, но контролата што ја поседува сепак претставува опасна ситуација.
„Што се однесува до она што можам да го направам сега, вклучува деактивирање на Sentry Mode, отворање на врати и прозорци и активирање на возење без клуч. Можам и да ја добијам точната локација на возилото, да проверам дали возачот е во автомобилот и слично. Списокот е доста долг, мислам дека тоа е опасна ситуација. Ако некој може да ја зголеми јачината на музиката во вашиот автомобил, да ги отвори прозорците и вратите додека сте на автопат, па дури и постојано да ги вклучува светлата, тоа може да има штетни последици“, рече Коломбо.
Тој потврди дека Tesla веќе го контактирала и го истражува случајот. Истакнува дека никогаш немал лоши намери и дека неговите објави го потврдуваат тоа.