Латералниот бек на Интер денеска стави потпис на договорот со францускиот гигант со што заврши сагата за неговиот долгонајавуван трансфер.
Мароканскиот репрезентативец Ашраф Хакими од денеска е нов член на Пари Сен Жермен. Тој потпиша петгодишен договор, а за неговите услови Французите на Интер ќе му искешираат 71 милион евра. Токму поради таа голема сума Италијанците се решија да го продадат еден од своите најдобри играчи, како би излегле од долгот кој клубот го имаше акумулирано.
„Во ПСЖ сме возбудени што можеме да го објавиме комплетирањето на трансферот на Ашраф Хакими. 22-годишниот десен бек од Мароко, кој поседува и шпанско државјанство, потпиша петгодишен договор и се обврза да остане во францускиот главен град до 30 јуни 2016 година“, објави гигантот од Париз.
„Денеска имав големо чувство на гордост. После Шпанија, Германија и Италија, ПСЖ ми нуди шанса да откријам ново првенство со еден од најпрестижните клубови во светот. Едвај чекам да ги запознаам новите соиграчи, навивачите и да ги искусам неверојатните бои и страст внатре во 'Паркот на Принцовите'. Ги делам истите големи амбиции како и тренерскиот тим и соиграчите и ќе дадам сѐ од себе да го остварам она што се очекува од мене“, се првите зборови на Хакими како играч на ПСЖ.
