Дизајнерот Ели Сааб неодамна ја прослави својата незаборавна кариера во Саудиска Арабија, по повод настанот наречен „1001 Seasons of Elie Saab“, кој собра бројни познати личности и уметници. Меѓу нив се истакна Хали Бери.
Хали Бери повторно го облече својот иконски бордо фустан од овој моден мајстор, кој стана симбол на нејзината оскаровка во 2002 година за улогата во филмот „Monster's Ball“.
На прославата, на која учествуваа повеќе од 300 модели, секојa со уникатен изглед, Хали Бери блескаше на пистата во истиот фустан што го носеше пред 22 години.
Веќе икона, фустанот со проѕирно елече украсено со цветни детали беше изложен во филмскиот музеј на Академијата во Лос Анџелес, а сега повторно дојде до израз во спектакуларниот амбиент на овој фестивал на Блискиот Исток.
Бери на нејзиниот Instagram профил сподели емотивна порака за благодарност до дизајнерот Ели Сааб.
„Освојувањето на Оскар во фустанов беше еден од оние моменти кои го променија животот. Ви благодарам, господине Сааб што сте дел од мојот живот. Нераскинливо сме поврзани 22 години. Беше чест да ве прославиме вас и вашите '1001 Seasons'“, напиша таа.
Покрај Бери, на сцената се појавија и Селин Дион, Џенифер Лопес, Камила Кабељо, Ненси Ажрам, Моника Белучи и Амр Диаб.
