Англија на Европското првенство пристигна како фаворит број 1 за освојување на титулата, но дома се врати без трофеј. Во неделата Англија доживеа пораз во финалето од Шпанија (1:2). Пресуди голот на Микел Ојерзабал на 4 минути пред крајот.
Англија 58 години чека на голем трофеј, чека фудбалот „да се врати дома“, впечатокот е дека со игра каква што прикажа на ЕУРО 2024 ќе чека уште долго на голем трофеј.
Фудбалскиот свет е согласен дека со талентот и индивидуалниот квалитет што го поседува, Англија играше премногу резервирано, со многу играчи зад топката и со определба да не се прими гол.
„Играа ужасен фудбал. Од десетте најлоши натпревари на турнирот, Англија играше на седум од нив. Не знам зошто Хари Кејн не се движи. Беа во негатива во секој натпревар од нокаут фазата“, изјави Дитмар Хаман за RTE Sport.
Фудбалерот кој одигра 59 натпревари и постигна 5 гола за Германија, со која загуби од Бразил (0:2) во финалето на Светското првенство во 2002 година, дополнително ја објасни играта на Англичаните.
„Замислете овој тим да води во еден натпревар. Замислете да играте со Фил Фоден, а потоа да го ставите во игра Гордон. Англија има врвни играчи на клупата за да го подигне темпото. Но, тие немаа шанса да го покажат тоа бидејќи Саутгејт инсистираше да ги започнува натпрварите со Белингам и Кејн“, рече тој.
Во групната фаза Англија ја победи Србија (1:0) и ремизираше со Данска (1:1) и Словенија (0:0). Словачка во осминафиналето ја победи по продолженијата (2:1), Швајцарија во четвртфиналето по изведувањето пенали, додека во полуфиналето ја победи Холандија (2:1) со голот на Оли Воткинс постигнат во 90-тата минута.
Диди Хаман во својата кариера по заминувањето од Баерн долго играше на Островот за Њукасл Јунајтед, Ливерпул, Болтон Вондерерс, Манчестер Сити и Милтон Кинс Донс.
