Милитантната група Хамас ја поздрави одлуката на Шпанија, Норвешка и Ирска да ја признаат независната палестинска држава.
Високиот функционер на Хамас Басем Наим за AFP изјави дека зад овој потег стои храбриот отпор на палестинскиот народ.
„Овие последователни признавања се директен резултат на храбриот отпор и легендарната непоколебливост на палестинскиот народ. Веруваме дека ова ќе биде пресвртница во меѓународниот став за палестинското прашање“, рече Наим.
Одлуката на трите европски земји ја поздрави и палестинското Министерство за надворешни работи со седиште на Западниот Брег: „Министерството за надворешни работи ги поздравува одлуките на Шпанија, Норвешка и Ирска. Овие земји уште еднаш ја покажаа својата непоколеблива посветеност на решението за две држави и донесувањето на долгоочекуваната правда на палестинскиот народ“.
„Понатаму, признавањата на Шпанија, Норвешка и Ирска се во согласност со меѓународното право и со сите релевантни резолуции на Обединетите нации, што пак позитивно ќе придонесе за сите меѓународни напори насочени кон ставање крај на илегалната окупација на Израел и постигнување мир и стабилност во регионот“, додава тој.
