Луис Хамилтон синоќа дојде до својата 99-та победа во кариерата, но на контроверзен начин.
Британскиот возач уште во првиот круг на трката за Големата награда на Велика Британија во Силверстоун имаше судир со Макс Верстапен поради кој возачот на Ред Бул мораше да ја напушти трката.
Судирот го чинеше Хамилтон казна од 10 секунди, но сепак на крајот успеа да победи и по осми пат да слави во Силверстоун.
По трката истакна дека казната била неправедна и дека воопшто не смета дека треба да му се извини на Верстапен за судирот поради кој Холанѓанецот не ја продолжи трката.
„Сметам дека не треба да ми се извинувам на Верстаптен, за ништо. Ние само се тркавме. Не се согласувам ниту со казната која ја добив, но ја прифатив и продолжив да возам. Нема сега да се жалам за тоа. Секој има различно видување за ситуацијата и, искрено, не ми е гајле што велат останатите“, изјави Хамилтон.
Хамилтон се обидуваше да го претекне Верстапен и на една кривина малку го поткачи за десното задно тркало, доволно за Холанѓанецот да излета од патеката.
Со оглед на тоа што во генералниот пласман лидер сезонава е токму Верстапен, судирот е додатно контроверзен кога ќе се земе предвид дека со вчерашната победа Хамилтон значително му се доближи на табелата и сега разликата изнесува 8 поени за Холанѓанецот.
На подиумот во Силверстоун освен Хамилтон се искачија и Шарл Леклер како втор и Валтери Ботас на третото место.