Репрезентативците на Аргентина во Буенос Аирес вчера беа пречекани од скоро 5.5 милиони луѓе, но прославата за шампионската титула не мина според очекуваното.
Фудбалерите наместо со автобус беа префрлени со хеликоптер до претседателската палата. На дел од навивачите не им се допадна промената на планот, па некои од нив фрлаа предмети кон полицајците. Се појави и снимка од налутени навивачи како се забавуваат со украден полициски автомобил.
До 15:30 часот на пречекот беа регистрирани 8 повредени луѓе, а во меѓувреме се појави и трагична вест дека е загинато 24-годишно момче кое паднало низ покрив.
Друг навивач починал во болница од повреди на главата здобиени во текот на прославата. Се стравува и за судбината на 5-годишно дете кое е во кома откако е повредено на плоштадот.
Аргентинските медиуми пренесуваат дека во конфликт со полицијата се повредени најмалку 21 лице, меѓу кои има полицајци и пожарникари.
Уапсени се 14 лица откако полицајците се обиделе да евакуираат група луѓе што се забавувала внатре во споменикот, па останатите навивачи ги нападнале со камења и шишиња по што избил жесток конфликт.
