Џејмс Харден јавно призна дека не е задоволен во Хјустон Рокетс и сака да го напушти клубот.
Харден го пропушти почетокот на сезоната затоа што беше во изолација откако беа објавени фотографии како се забавува во еден ноќен клуб само еден ден пред почетокот на НБА лигата.
Иако во НБА круговите се „шушкаше“ дека тој е незадоволен и дека сака да го напушти клубот, на почетокот на сезоната тој беше брилијантен и постигна 44, 34, односно 33 поени на првите три натпревари.
Но, после тоа тој почна да игра сѐ полошо и од неговиот говор на тело на следните натпревари беше јасно дека воопшто не му се игра. Тој во последните пет натпревари има просек од само 17,8 поени, а има постигнато 20, односно 16 поени во двата последователни порази од Лејкерси.
На прес-конференцијата по неговиот последен натпревар против Лејкерс, тој јавно изјави дека е незадоволен.
„Едноставно, не сме добра екипа. Го сакам овој град, направив сѐ што можев за него. Овде е лудило и ситуацијата веќе не може да се поправи“, рече Харден
На Харден не му беше дозволено јавно да каже дека сака да го напушти тимот бидејќи тоа е казниво со 50.000 американски долари според прописите на НБА, но јасно е дека наскоро ќе го напушти Хјустон.