Бакингемската палата го објави протоколот за погребот на принцот Филип, на којшто ќе мора сите присутни да се придружуваат. Како што е наведено, принцовите Вилијам и Хари нема да дојдат заедно во капелата и нема да стојат еден до друг на погребот.
Меѓу нив во поворката ќе оди нивниот роднина Питер Филипс. Оваа одлука ја донесе лично кралицата Елизабета Втора, но тоа сигурно нема да ги запре шпекулациите за раздорот меѓу браќата, ниту ќе разбуди надеж за помирување во ова семејство во ваков тажен момент, пишува Guardian.
Бакингемската палата истакна дека не сака никаква перцепција на драма којашто јавноста би можела да ја извлече тој ден. Портпаролот изјави дека ангажманите се договорени и претставуваат желба на нејзиното кралско величество.
Никој од кралското семејство нема да ги носи своите воени униформи, поради принцовите Ендру и Хари. Ендру остана без кралските привилегии по аферата со Џефри Епстин, додека Хари ги изгуби со преселбата во Калифорнија и со отстапување од кралските должности.
Погребот ќе биде утре, на 17 април во Виндзор. Поради пандемијата ќе присуствуваат само одбрани луѓе, Бакингемската палата објави список од 30 луѓе кои ќе го испратат војводата од Единбург до неговото вечно почивалиште.