Угледниот американски магазин Time секоја година објавува листа на највлијателни луѓе, како и личност на годината.
Овојпат, еден од основачите на талибанското движење, Абдул Гани Барадар, беше меѓу 100-те највлијателни луѓе.
Како и претходните години, магазинот Time ги подели највлијателните луѓе во неколку категории, а меѓу другото, беше направена и листа на највлијателните лидери кои ја одбележаа оваа година.
На оваа листа, како што и се очекуваше, се најдоа лидери како американскиот и кинескиот претседател, Џо Бајден и Си Ѓинпинг, новиот израелски премиер Нафтали Бенет, како и иранскиот лидер Ебрахим Раиси.
Интересно, на листата има и име што предизвика многу контроверзии во последниот период. Имено, Time го вклучи еден од основачите на талибанското движење, Абдул Гани Барадар, на листата на највлијателни лидери. Магазинот Time го оцени Барадар како „харизматичен лидер“ и „длабоко побожна личност“.
„Кога талибанците прогласија победа во Авганистан во август, тоа беше под услови за кои преговараше Барадар. За него се вели дека ги носи сите важни одлуки, вклучително и оние за амнестија за припадниците на поранешниот режим. Тој исто така е заслужен за спречување на крвопролевање кога талибанците влегоа во Кабул, како и за одржување врски со Кина и Пакистан“, пишува Time.
Списанието нагласува и дека Барадар е иднината на Авганистан.
„Тој беше назначен за вицепремиер во привремената влада, а главната улога му беше доделена на друг лидер, многу поприфатлив од тврдоглавата генерација на талибански команданти. Барадар е тивок и таинствен човек кој претставува умерена струја што треба да добие поддршка од Западот“, се вели во образложението.