Фудбалерите на Интер го совладаа Кротоне со 6:2 на „Џузепе Меаца“ во 15. коло од Серија А и со тоа стигнаа до осмиот последователен триумф во лигата.
Натпреварот не започна баш најдобро за „Нераѕурите“ бидејќи Николо Ѕанелато ги донесе гостите во водство во 12-тата минута. Сепак, славјето на гостите траеше само осум минути бидејќи Лаутаро Мартинес израмни.
По половина час игра, Интер дојде до пресврт со автоголот на Лука Мароне, но пет минути подоцна Кротоне повторно погоди. Владимир Големиќ погоди од белата точка и се замина на пауза со резултат од 2:2.
Во продолжението, Интер постигна уште четири гола за убедлива победа на почетокот на новата 2021 година. Фантастичниот Лаутаро постигна уште два гола и со тоа го комплетираше хет-трикот, а погодија и Ромелу Лукаку и Ашраф Хакими.
Со денешната победа, Интер, барем за кратко време, го престигна градскиот ривал Милан и ја зазеде лидерската позиција. Во моментов има два бода повеќе, но Милан игра помалку. Кротоне е на 19. претпоследно место.
Хет-трикот има и историска димензија: на истиот стадион, еден друг Аргентинец на 6 јануари 2005 година постигна хет-трик на првиот натпревар во Серија А во новата година – Ернан Креспо за Милан против Лече (5:2).
