Ерлинг Холанд ги постигна двата гола на Манчестер Сити во победата над Вест Хем (2:0) на отворањето на англискиот шампионат и со тоа на најдобар начин се претстави во новата лига, во која пристигна како голема ѕвезда од Борусија Дортмунд.
Зборувајќи со новинарот на Sky Џеф Шривс по натпреварот, тој двапати употреби вулгарен збор.
„Добар почеток, нема што друго да се каже. Добро беше да се настапи, да се добие минутажа бидејќи сè уште е рана фаза од сезоната. Мора да продолжиме, го видовме потенцијалот против Баерн, против Ливерпул бев малку паднат, но ќе биде добро“, изјави Холанд.
Тренерот Пеп Гвардиола го извади од игра во 78. минута. Тој беше запрашан дали се кае што не постигна хет-трик.
Поради неговиот одговор, Sky мораше да ја цензурира изјавата.
„Видовте што направи Илкај Ѓундоан откако излегов, требаше да бидам таму. Сра*е, но така е“, рече тој, што го поттикна Шривс да го замоли да внимава на речникот.
„Сра*е, извини. Не ми оди добро јазикот во оваа земја“, рече потоа Холанд и се насмеа со новинарот.
Првиот гол, норвешкиот напаѓач го постигна во 36. минута од пенал, кој сам го доби, додека вториот падна во 65. кога Кевин де Брујне му даде длабока топка, а тој се намести на левата нога и погоди.
