Манчестер Сити успеа да победи само еднаш во последните 12 одиграни натпревари. Во таа серија има дури девет порази и тимот е во резултатска криза во која ја нема од преземањето на Пеп Гвардиола во 2016 година. Дел од вината презеде и Ерлинг Холанд.
Норвешкиот напаѓач минатата сезона во англиското првенство постигна 27 гола на 31 натпревар, а претходната година дури 36 на 35 натпревари во Премиер лигата. Почна добро и оваа сезона, но на последните шест натпревари постигна само еднаш, а на последните 12 првенствени само три пати.
Тој истакна дека „не е доволно добар“ и дека тоа е и причината поради која Сити моментално е само седмиот тим во англискиот шампионат, со 12 бода помалку од водечкиот Ливерпул, кој одиграл натпревар повеќе од нив. Има се помалку луѓе кои мислат дека Сити ќе ја брани титулата и се повеќе луѓе кои го обвинуваат норвешкиот напаѓач за пад на формата. Гвардиола не е меѓу нив.
„Се работи за нас, не само за еден играч. Кога претходно постигнувавме многу голови, Ерлинг профитираше поради работата на тимот. Сите ги чувствуваат проблемите во последниот ред и во редот за врска. Тимот. Би било лесно да се каже дека поединец е виновен за нашата криза, но тоа не е точно, Ерлинг беше важен за нас, тој е важен сега и ќе биде во иднина“, изјави Гвардиола.
Оваа сезона Холанд има 13 гола од 17 првенствени натпревари и вкупно 18 од 24 натпревари во сите натпреварувања. На последните три натпревари во кои играше остана без гол, асистенција, создадена можност, дриблинг и шут. Сити ги играше против Јувентус, Манчестер Јунајтед и Астон Вила.
