Агентот Мино Рајола имаше одржано состанок со челниците на каталонскиот гигант, а детали од раговорот излегоа во јавност по што станува јасно дека норвешкото чудо нема да пристигне на „Камп Ноу“.
Неодамна, контроверзниот италијански агент Мино Рајола и таткото на Холанд, поранешниот фудбалер Алф Инге Холанд, беа во Барселона каде преговараа околу можниот трансфер на норвешкиот голгетер и сегашен член на Борусија од Дортмунд, Ерлинг Браут Холанд.
Како што јавува каталонското радио RAC1, преговорите траеле два часа. Рајола побарал од Барселона 20 милиони евра само за неговите услуги, а исто толку побарал и Холанд постариот. Воедно, побарале и 30 милиони евра годишна плата за 20-годишниот Норвежанец.
Капак на тоа е и отштетата која ја бара Борусија, а изнесува вртоглави 150 милиони евра.
Со оглед на тоа што Барселона е во минус од дури 1,2 милијарди евра, јасно е дека ваквите услови се невозможни за Каталонците, и оттаму Холанд нема да го облече дресот на Барселона.
