Норвешкиот голгетер во документарниот филм „Haaland: The Big Decision“ откри интересни детали поврзани со преминувањето во Манчестер Сити.
Норвешкиот голгетер откри дека англискиот првак година и пол плетел мрежа, а сѐ започнало со двобојот против Борусија Дортмунд во четвртфиналето од Лигата на шампиони, клуб за кој Ерлинг Браут Холанд тогаш настапуваше.
„По тој натпревар мислам дека 15 луѓе дојдоа за да ми кажат да отидам кај нив. Стоунс, Рубен Диаш, Ѓундоан, Фоден, Де Брујне... Никогаш не сум носел одлука за нареден клуб поради тренерот кој го води, но голем плус е тоа што Пеп Гуардиола е во Сити, тој е најдобриот тренер во светот. Сити моментално е најдобриот спортски проект во светот и тоа е место каде ќе можам да бидам најдобар“, рече Холанд.
Тогаш се нагаѓаше кој го посакува, а во документарецот сам открива каква била интерната листа на заинтересирани клубови која ја составувале тој и неговиот татко, инаку поранешен играч од Премиер лигата кој настапуваше за Нотингем Форест, Лидс Јунајтед и Манчестер Сити.
„Мислам дека Манчестер Сити беше најдобрата екипа на нашата листа. Баерн беше на второ место. На третото беше Реал, а потоа Пари Сен-Жермен. Се разбира, покрај Сити, на листата имаше уште неколку англиски тимови кои се доста добри - Ливерпул и Челси. Беше таму и Барселона, сите отприлика беа во ист ред“, откри Норвежанецот.
Дека ја донел вистинската одлука покажува и почетокот на сезоната каде во првите 10 натпревари во сите натпреварувања постигна 14 гола.