Прволигашот Емен остана без главниот спонзор откако КНБВ донесе забрана компанијата за секс играчки EasyToys да биде спонзор на фудбалски клуб.
Емен веќе имаше склучено договор со EasyToys според кој уште пред почетокот на новата сезона требаше да инкасира 500 илјади евра, но сето тоа се изјалови. Нема ни накнадно да добие ниту евро од спонзорот бидејќи КНВБ забрани секс-компанија да биде дел од фудбалскиот свет.
„Многу сме разочарани што нема да бидеме главниот спонзор на Емен. Ги разгледуваме опциите што ни останаа, во разговор со Емен. За нас, соработката беше логичен избор. Ние сме две успешни компании од ист регион и чувствуваме посебна врска со клубот кој, како и ние, игра на највисоко ниво. Не гледаме никаков проблем“, рече Ерик Идема, извршен диренток на EasyToys.
Емен трета сезона по ред ќе биде дел од најквалитетната холандска лига откако претходно со децении беше заглавен во втората лига. Лани заврши на 12. место.
Ниту претседателот на Емен, Роналд Луберс, не се согласува со одлуката на КНВБ.
„Бевме цврсто убедени дека силата на комбинацијата на двете компании ќе направеше една силна соработка. Ерик успеа со неговата компанија да стане лидер на европскиот пазар во она што за луѓето е една нормална активност. Зарем не е добро тоа што компанија со потекло од југоисточниот дел на Дренте успеа да стигне до таму?“, праша тој.
Емен е клуб од истоимениот град кој се наоѓа во провинцијата Дренте во североисточниот дел на Холандија.
