Хорор повреда во Париз: Светски рекордер заврши во болница по пад на глава при трка

Етиопскиот атлетичар Ламеча Гирма заврши во болница по несреќниот пад за време на финалето на 3.000 метри со пречки на Олимпијадата во Париз.

Во еден момент, Етиопјанецот се заглави на една од пречките и буквално се преврте наопаку. Поранешниот светски рекордер беше краток за еден сантиметар, а по падот остана неподвижен, додека останатите спортисти добија уште една „дополнителна пречка“ на патеката.

По немилиот настан на вицешампионот од Токио во оваа дисциплина му беше укажана помош. Вратот му беше имобилизиран, го ставија на носилка и го однесоа во болница. Ламеча првично бил без свест, но по неколку минути си дошол при себе и бил свесен при транспортот, пренесуваат светските медиуми.

„Нашите мисли се со Ламеча и му посакуваме брзо закрепнување. Париз 2024 е во контакт со Етипскиот олимписки комитет за да бидат информирани за неговата состојба“, соопштија од организацијата на Олимпијадата во Париз.

23-годишниот Ламеча го држи актуелниот светски рекорд во оваа дисциплчина со време од 7:52.11, поставен лани на митингот во Париз во рамките на Дијамантската лига.