За секој од нас има некоја храна која ни причинува особено задоволство.
За некои тоа е сладолед по долг, стресен ден, за други тоа е кока-кола после неколку парчиња пица во петок навечер.
Повеќето лекари и нутриционисти знаат дека целосното лишување од храната што ја сакаме ќе има негативен ефект, што ќе предизвика да јадеме повеќе отколку што треба од таа храна подоцна.
Но, постојат одредени намирници кои гастроентеролозите ги избегнуваат 99 проценти (а понекогаш и 100 проценти) од времето.
Протеински барови
Протеинските барови звучат како здрава храна, но понекогаш се премногу преработени. Поради ова, може да предизвикаат надуеност и гасови, вели гастроентерологот Хармони Алисон.
„Никогаш не јадам протеински барови. Тие обично се многу преработени и содржат многу адитиви. Можете да ја добиете истата количина на протеини со пиење чаша млеко или со јадење путер од кикирики, јаткасти плодови или семки од тиква“, рече таа.
Црвено месо
Љубители на сочни кременадли, извинете. Гастроентеролозите се држат настрана од оваа храна.
„Го избегнувам црвеното месо, особено кременадлите и плескавиците. Црвеното и преработеното месо го зголемува ризикот од рак на дебелото црево и полипи на дебелото црево. Има висок процент на заситени масти, а ако сакате да го консумирате, обрнете внимание на количината. Ризикот од рак на дебелото црево е поголем кај оние кои консумираат повеќе од 100 грама дневно“, тврди гастроентерологот Ризвана Чаудхури.
Виршли
Малкумина ќе одбијат виршли, но гастроентерологот Рабиа Де Латур секогаш се држи настрана од таквата храна.
„Податоците го поврзуваат внесот на црвено и преработено месо четири или повеќе пати неделно со дури 20 отсто поголем ризик од рак на дебелото црево“, истакна таа.
Похувана и пржена риба или пилешко
Медалјоните од пилешко или риба можеби се вкусни, но тие не му прават услуга на нашето здравје на цревата.
„Студиите покажаа дека маслото за пржење може негативно да го модулира цревниот микробиом, што доведува до влошување на атеросклерозата.„
Газирани пијалоци
Ако редовно пиете газиран пијалок или кој било друг вид на засладен пијалок, можеби е време да се обидете да се откажете од оваа навика.
„Овие пијалоци се поврзани со хронични состојби, како што се дијабетес и срцеви заболувања. Покрај тоа, тие предизвикуваат гастроинтестинални симптоми како надуеност, подригнување и рефлукс, особено кога се комбинираат во нивните газирани и кофеински форми“, вели д-р Сајмон Ц. Метјуз.
Бел леб
Според гастроентерологот Шилпа Гровер, рафинираните житарки исто така не се добри за нашите црева.
„Студиите кои ги проценуваат моделите на исхрана јасно покажаа дека високиот внес на црвено и преработено месо и рафинирани житарки е поврзан со зголемен ризик од дивертикулитис. Спротивно на она што претходно се мислеше, јаткастите плодови, пченката и пуканките не се поврзани со зголемен ризик за развој дивертикулоза или компликации како дивертикулитис или крварење“, истакна таа.
