Хрватска, Албанија и Косово потпишаа декларација за зајакнување на одбранбената соработка која треба да придонесе за безбедноста на Југоисточна Европа, соопшти хрватското Министерство за одбрана.
Декларацијата во Тирана ја потпишаа министрите за одбрана на трите земји Иван Анушиќ, Пир Венгу и Ејуп Маќедончи.
Декларацијата, на која може да и се приклучат и други држави, ја нагласува важноста на заедничките одговори на безбедносните предизвици, хибридните закани и другите ризици кои би можеле да ја загрозат регионалната стабилност.
Документот ги промовира одбранбените способности и соработката меѓу одбранбените индустрии, зајакнувањето на интероперабилноста преку образование, обука и вежби, спротивставување на хибридните закани и целосна поддршка за евроатлантската интеграција, соопшти Министерството.
Анушиќ рече дека новата геополитичка ситуација бара создавање нови и зајакнување на постоечките сојузи, а Хрватска, Албанија и Косово имаат силен заеднички интерес за зачувување на стабилноста во Југоисточна Европа.
„Нашите односи со Косово и Албанија се долги и пријателски, а соработката што ја развиваме се заснова на сојузништво и заеднички интереси... Целта е да се зајакне политичката и одбранбената соработка на нашите земји и да се поддржат Косово и Албанија на нивниот евроатлантски пат“, рече тој.
Анушиќ, кој е во дводневна посета на Албанија, се сретна и со албанскиот претседател Бајрам Бегај и архиепископот Арјан Додај, се вели во соопштението на Министерството за одбрана.
