Минатата година филмскиот свет го разбранува веста дека ќе се снима римејк на култниот „Matrix“.
Фановите беа бесни, но потоа стигна појаснување – се снима „Matrix 4“, односно се враќаат Кијану Ривс и Кери-Ен Мос како Нео и Тринити.
Иако се познати многу малку детали за новиот проект, едно е сигурно – сценариото е напишано и според Ривс, е одлично.
Кијану Ривс завчера се појави на премиерата на филмот „Semper Fi“, чиј продуцент е неговата полусестра Карин Милер, а новинарите го распрашаа за новиот „Matrix“.
„Го прочитав сценариото и апсолутно сум одушевен од приказната што ги очекува главните јунаци“, рече Ривс и додаде дека „филмот е навистина амбициозен“, но и дека „таков и треба да биде“.
Првиот дел од филмот имаше премиера во 1999 година. Тогаш заработи 460 милиони долари, а досега франшизата има заработено 1,6 милијарди долари.
Браќата Вачовски ги снимаа првите три дела од франшизата, пред и двајцата да го променат полот и сега се сестрите Вачовски – Лари стана Лана, а Енди – Лили.
Сега само Лана се враќа да го раскаже четвртиот дел од приказната за светот во кој ако ја земете „вистинската“ пилула, откривате дека сте приклучени на огромна машина која ве лаже дека живеете, а вашата енергија го движи светот во кој владеат машините.
