Лидерот на Северна Кореја, Ким Џонг Ун, предупреди дека земјата се соочува со најлошата ситуација во историјата. Тој го предупреди народот да се подготви за тешка криза поради недостиг на храна.
Севернокорејскиот лидер вчера одржа говор на конференцијата на владејачката Работничка партија, предупредувајќи за „многу пречки и тешкотии“ со кои земјата се соочува.
Ситуацијата ја спореди со смртоносниот глад од 90-тите години на минатиот век, којшто следеше како последица поради изгубената поддршка од СССР, природни катастрофи и неуспешна економија. Лидерот вели дека сега земјата се соочува со најлошата ситуација во историјата.
Северна Кореја ги затвори границите поради пандемијата и ја замрзна трговијата со најголемиот економски сојузник, Кина. Исто така, земјата е под санкции поради понатамошното развивање на нуклеарната програма.
Ким ги повика партиските функционери на нов, потежок „исцрпувачки марш“ (познат и како марш на страдањето) со цел да му ги олеснат маките на народот. Исцрпувачки марш е термин, метафора со кој се означуваат маките на земјата за време на големиот глад во 90-тите години, кога починаа 3 милиони Севернокорејци по распадот на Советскиот Сојуз.
„Партијата мора да ја награди лојалноста на народот и да му стане вистински слуга“, истакна Ким.