Добитничката на Нобеловата награда за мир Малала Јусафзаи ја нарекуваат „херој“ поради начинот на кој одговори на неумесната шега на Џими Кимел на доделувањето на Оскарите.
Најмладата добитничка на Нобеловата награда за мир беше на 95-тото доделување на Оскарите како извршен продуцент за филмот „Странец пред врата“, кој беше номиниран во категоријата за најдобар краток документарен филм.
За време на паузата во шоуто, водителот Џими Кимел се симна пред публиката за да изведе уште еден сет од неговите шеги.
Тој ѝ пријде на Малала, ѝ се заблагодари што дојде и ѝ честиташе на номинацијата.
Меѓутоа, работите станаа чудни кога Кимел се преправаше дека поставува прашање од измислена гледачка а по име „Џоан“.
„Вашата работа за човековите права и образованието за жените и децата е инспирација“, започна Кимел.
„Како најмлада нобеловка во историјата, се прашувам, дали мислите дека Хари Стајлс го плукна Крис Пајн?“
Настана тишина, проследена со неколку посмевања, а на Малала ѝ беше видно непријатно.
„Зборувам само за мир“, му рече таа откако си дојде на себе.
Кимел додаде: „Знаеш што, затоа ти си Малала, а никој друг не е. Тоа е одличен одговор Малала. Победникот е Малала-ленд", ја заврши својата поента водителот, а публиката го награди со аплауз.
„Шегата“ на Кимел беше за пејачот и актерот Хари Стајлс и виралното видео во кое тој наводно плука по актерот Крис Пајн на премиерата на „Не грижи се, мила“.
Малала на својот Twitter профил го објави и видеото од Оскарите.
„Бидете љубезни кон луѓето“, напиша таа покрај објавата.
Пакистанската активистка доби илјадници коментари во кои ја нарекуваат „херој“ и „инспирација“ за тоа како се справила со неумесната шега.
„Тотално непочитување и исмејување на неа и нејзината работа“, „Убаво му кажа и убаво изгледаше“, „Тоа беше страшно прашање. Прекрасно се справивте со ситуацијата“, „Гордоста на Пакистан“, „Секогаш достоинствена“, се само неколку од коментарите под објавата, која собра над три милиони прегледи.