Кинескиот министер за надворешни работи Чин Ганг предупреди дека ќе има „конфликт и конфронтација“ доколку Вашингтон не успее да го промени курсот во односите со Пекинг.
Изјавата доаѓа во време на зголемени тензии околу конфликтот околу Тајван, руската инвазија на Украина и дебатата за потеклото на коронавирусот, објави Associated Press.
Изјавата на шефот на кинеската дипломатија сугерира дека Кина не е подготвена да се откаже од својата конфронтирачка реторика. Чин на вчерашната прес-конференција рече дека политиката на Вашингтон за Кина „целосно отстапила од рационалниот и здрав колосек“.
„Ако Соединетите Американски Држави не прикочат, туку продолжат да забрзуваат по погрешниот пат, никакви заштитни огради не можат да го спречат излетувањето од шините, а ќе дојде до конфликт и конфронтација. Таквото натпреварување е безобѕирно коцкање, каде влоговите се фундаменталните интереси на двете нации, па дури и иднината на човештвото“, додаде Чин на својата прва прес-конференција по преземањето на функцијата минатата година.
Во меѓувреме, кинескиот претседател Си Ѓинпинг ги обвини западните влади предводени од САД дека се обидуваат да ја опколат и потиснат Кина.
„Западните земји предводени од Соединетите држави извршија сеопфатно задржување, опкружување и потиснување на Кина, што донесе невидени и сериозни предизвици за развојот на нашата нација“, рече Си, цитиран од официјалната новинска агенција Xinhua.
Кинескиот лидер истакна дека поради тоа Кина мора „да остане смирена, да ја задржи концентрацијата, да се стреми кон напредок додека ја одржува стабилноста, да преземе активни акции, да се обедини и да биде подготвена за борба“. Западните аналитичари велат дека односите на Кина со Вашингтон, Јапонија, Индија и другите азиски соседи се влошени бидејќи владата на Си води агресивна надворешна политика.