Досега од корона вирусот, наречен COVID-19, починаа над 1.100 луѓе, а кинеската влада спроведува бројни мерки во борбата против него. Меѓу нив е и користењето на апликацијата Close Contact Detector.
Апликацијата им овозможува на корисниците по скенирање на QR кодот со користење на апликации како Alipay, WeChat и други, да го запишат името и ID бројот, како и уште други ID броеви. Потоа, апликацијата ќе ја пребара базата и ќе го извести корисникот доколку бил во контакт со некој заразен со корона вирусот или со личност која има сомнителни симптоми.
Точните детали на функционирање на апликацијата не се познати, но државната новинска агенција Xinhua вели дека има поддршка од бројни кинески агенции и од министерствата.
Поради тоа што апликацијата од корисникот бара внесување на идентификациски број, веќе се зборува дека Кина не сака да се откаже од навлегувањето во личната приватност и следење на граѓаните, а во тоа апликацијата ќе помогне, со оглед на тоа дека системите за препознавање лица не функционираат поради заштитените маски.