Исчезнатата кинеска тенисерка, 35-годишната Пенг Шуаи, наводно се појави во јавноста, првпат од почетокот на овој месец, пишуваат денеска дел од кинеските медиуми.
Видеоснимки на кои се гледа тенисерката како се поздравува и потпишува топчиња пред насобрани деца објавија организаторите на тенискиот турнир во младински категории Чајна Опен, кој во моментов се одржува во Пекинг.
Покрај организаторите, „докази“ за појавувањето на тенисерката се појавија и на други интернет страници, а видеоматеријал и фотографии на кои може да се види 35-годишната Шуаи на својот Twitter профил сподели и главниот уредник на весникот Global Times, Ху Ксиџин.
Кинеските власти и тамошните државни медиуми претходно демантираа дека Шуаи е киднапирана, откако на почетокот на ноември објави дека висок кинески функционер сексуално ја злоставувал пред три години.
Властите во Пекинг тврдат дека тенисерката се чувствува добро и престојува во нејзиниот дом, но ова станува уште повеќе сомнително.
Сите досегашни „докази“ од меѓународната заедница беа дочекани со голема резервираност, вклучувајќи го и ова прво наводно појавување на Пенг Шуаи во јавноста.