Новиот коронавирус SARS-CoV-2 се однесува различно кај пациентите во североисточна Кина кои неодамна се заразиле во споредба со претходните случаи, што укажува дека се менува како што се шири, изјави кинескиот експерт Киу Хаибо.
Кина, која генерално ја стави епидемијата со COVID-19 под контрола во своите граници, во изминативе неколку недели откри нови кластери во провинциите Ѓилин и Хеилонгѓијанг во североисточните делови на земјата, што предизвика загриженост за ран втор бран на заразата.
Хаибо, експерт од Националната комисија за здравје, вели дека периодот на инкубација кај пациентите на североисток е многу подолг отколку кај заразените во Вухан, каде вирусот се појави кон крајот на минатата година.
„Тоа создава проблеми бидејќи луѓето немаат никакви симптоми. Можат да се сретнуваат со нивните семејства незнаејќи дека го носат вирусот, по што доаѓа до формирање на кластери“, истакнува експертот.
Според него, пациентите од кластерите во североисточна Кина исто така го носат вирусот многу подолго во споредба со раните случаи во Вухан и им треба повеќе време да оздрават.
Хаибо нагласува дека пациентите на североисток ретко имаат покачена температура и кај нив е позабележително оштетувањето на белите дробови, а не на другите органи.
Тој смета дека вирусот во кластерите во североисточна Кина најверојатно дошол од странство, поради што се разликува од другите случаи.