Кинеската компанија BAIC го претстави новиот член на својата богата понуда на теренци, а тоа е моделот BJ60.
Станува збор за модел кој претставува „сомнителна“ мешавина од дизајнот на моделот на Jeep и Land Cruiser на Toyota, а кој има хибриден погон.
BJ60 е долг 5.020 mm, широк 1.925 mm и висок 1.955 mm, додека меѓуоскиното растојание му е 2.820 mm. Тоа значи дека е малку подолг од Land Cruiser Series 300, но моделот на Toyota сепак го надминува по должината на меѓуоскиното растојание.
BJ60 е поголем од моделот BJ80 на BAIC, но помал од моделот BJ90 кој се базира на претходната генерација GLS на Mercedes.
Јасно е дека BJ60 е комбинација на елементи од неколку брендови. Осветлената решетка со LED дневни светла потсетува на Jeep, додека калниците и линиите на прозорците се инспирирани од Land Cruiser. Задните светла потсетуваат на оние на Ford Explorer.
Примерокот на прес-материјалот е лакиран во светлосина боја во комбинација со мат сребрени детали на праговите, носачите на покривот и рамките на прозорците, а има и комплет двобојни бандажи од 20 инчи.
Во внатрешноста има три реда седишта обложени со перфорирана бела кожа, а пред возачот е дигитален кластер. Централната конзола има 12-инчен самостоен екран за инфозабавниот систем, додека совозачката страна има пикселизирана графика.
На возачите им е достапен head-up дисплеј, а теренецот е опремен и со премиум звучен систем, амбиентално осветлување, седишта со функција за греење и панорамски покрив.
BAIC не откри детали за спецификациите, но беше потврдено дека BJ60 ќе има домет од 1.000 km благодарение на хибридниот погон. Од 0 до 100 km/h забрзува за 6 секунди, а силата на неговиот мотор се пренесува на сите четири тркала. Возачот има на располагање системи фокусирани на off-road, додека теренецот има и диференцијали што се заклучуваат.
Цената сѐ уште не е позната.