Британската единица за сајбер-безбедност ги предупреди телекомуникациските компании дека не треба да соработуваат со кинескиот производител ZTE, поради потенцијалното загрозување на националната безбедност.
Во САД веќе е издадена седумгодишна забрана за продажба и употреба на уреди произведени од ZTE, поради одбивањето на компанијата да се ослободи од вработените кои продаваа американска технологија и чувствителни информации на Иран и Северна Кореја.
Компанијата веќе ја запре продажбата на акции во Хонгконг и Шенжен уште денеска, откако САД ја издаде забраната, додека од Пекинг предупредија дека „ќе ги заштитат домашните компании, ако е тоа потребно“.
„Ризикот на националната безбедност кој го претставува користењето на уредите на ZTE во телекомуникациите не смее да биде превиден, па затоа решивме да преземеме мерки“, стоеше во соопштението на британската единица за сајбер-безбедност.
Според Financial Times, компаниите кои го користат мрежното покривање на британските телекомуникациски провајдери користат опрема на кинескиот производител Huawei, па соработката со уште една компанија од истата земја би можела да биде ризична, посебно во овој момент кога помеѓу Кина и западните земји се води трговска војна.
ZTE во март 2017 година се изјасни како виновник и ги прифати обвиненијата дека незаконски испраќал американска технологија во Иран и Северна Кореја. Дел од спогодбата беше ZTE да преземе мерки со кои ќе се казнат вработените кои биле дел од овој скандал, но наместо тоа компанијата проба да ги прикрие нивните идентитети и да го заташка случајот.