Кинеската полиција почнала да користи специјални очила кои имаат вградено технологија за препознавање на лица.
Очилата станале дел од опремата за надзор. Станува збор за наочари за сонце кои содржат напредна технологија за препознавање лица.
Моментално се во фаза на тестирање на железничките станици во еден кинески град, каде полицијата ги користи за „скенирање“ на патниците.
Станува збор за периоди на големи гужви и густ метеж воочи престојната прослава на Кинеската нова година.
Полицијата соопшти дека со помош на овие наочари биле откриени седум осомничени за извршување на тешки кривични дела, за потоа да бидат уапсени.
Исто така, биле откриени и 26 лица кои патувале под лажни идентитети.
Кина веќе подолго време вложува во напредните технологии за следење, односно за развој на вештачката интелигенција за идентификација на лица и дигитално следење на одредени лица во градовите.
Се проценува дека оваа земја ќе има повеќе од 600 милиони безбедносни камери до 2020 година.
Очилата се развиваат во градот Женгжоу, а ги произведува компанијата LLVision Technology, чие седиште се наоѓа во Пекинг.
