Продажбата на електрични автомобили од кинески марки во Европа е на најниско ниво во последните 18 месеци, покажуваат најновите податоци.
Бројот на регистрации во август е за речиси 50 отсто помал во однос на истиот месец лани.
Веќе знаеме дека апетитот на клиентите за автомобили со нулта емисија значително се намали во последно време. Со истиот проблем се соочуваат и кинеските производители на електрични автомобили кои имаат понуда на европскиот пазар.
Продажбата е на најниско ниво во последните 18 месеци. Во исто време, падот од 48 отсто доведе до фактот дека пазарниот удел на кинеските производители се намалува втор месец по ред.
Податоците исто така покажаа дека SAIC Motor Corp го загуби првото место во Европа од конкурентот BYD, кој беше еден од ретките што забележа раст од 10 проценти во регистрациите. На ова секако влијаеше и продажбата на марката MG (сопственост на SAIC), која падна за дури 65 отсто во осмиот месец, со оглед на тоа што брендот повеќе се фокусираше на хибридни и plug-in хибридни автомобили, а не на електрични возила.
Едно од објаснувањата за овој пад би можело да биде неизвесноста за дополнителните царини што Европската Унија сака да ги наметне на кинеските производители на електрични автомобили. Според последните информации, ЕУ неделава ќе ја финализира стапката на новите даноци.
Сепак, европскиот пазар генерално се соочува со постојан пад на бројот на регистрирани електрични возила, што е надополнето со неизвесноста со која се соочуваат производителите на автомобили. За осум месеци од годинава продажбата паднала за 5,5 отсто.
Производителите на автомобили ќе се соочат со построги цели на ЕУ за емисиите на CO2 следната година, бидејќи сегашната граница на просечните емисии на нови возила треба да се намали од 116 g/km на 94 g/km следната година. Европските производители на автомобили уште еднаш го повикаа Брисел да ги преиспита своите цели за климата.
