Кипарските власти ветија дека ќе ги платат трошоците за секој турист кој ќе се зарази со коронавирус додека престојува во земјата.
Оваа одлука е дел од пакетот мерки чија цел е да се вратат туристите на Кипар.
Владата вети дека ако турист се зарази за време на престојот во земјата, ќе ги плати сместувањето, лекувањето и храната за пациентите и нивните семејства.
Туристите ќе ги сносат „само“ трошоците за превоз до аеродром и за повратниот лет.
Туризмот придонесе со околу 15% кон БДП на Кипар минатата година, па владата прави сѐ за да ги врати туристите што е можно побрзо.
„Ударот е огромен и даваме сѐ од себе да го спасиме остатокот од сезоната“, изјави кипарскиоот заменик-министер за туризам Савас Пердиос, додавајќи дека напорно работеле за да го држат под контрола вирусот во земјата.
Кипар ќе обезбеди 100 болнички легла за туристи кои би се заразиле, како и т.н. „карантин хотели“ за семејствата на пациентите.
Кипар планира да ги отвори аеродромите на 9 јуни за неколку земји кои се сметаат за земји со низок ризик, како Германија, Грција, Израел и Малта. Листата ќе се ажурира на неделно ниво.
Пердиос смета дека туристите од Велика Британија и Русија, кои заедно сочинуваат повеќе од половина од туристите на Кипар, најверојатно ќе добијат дозвола за патување на медитеранскиот остров во јули.
Европските влади дискутираат кој ќе биде најдобриот начин да се рестартира летната сезона додека европските земји ја ставаат пандемијата под контрола.
Минатата недела 11 земји членки на ЕУ – Австрија, Бугарија, Хрватска, Кипар, Германија, Грција, Италија, Малта, Португалија, Словенија и Шпанија – се согласија да се постават правила со цел да се дозволи патување преку границите со најмал ризик за заразување со COVID-19.
На Кипар има 939 потврдени случаи на COVID-19 и 17 починати пациенти од болеста. Во пандемијата досега се заразени речиси 5,8 милиони луѓе ширум светот, од кои 2,5 милиони оздравеа, а речиси 360.000 починаа.