Владата на Северен Кипар соопшти дека наскоро ќе го отвори напуштениот град Вароша кој некогаш бил популарно туристичко место, а стана Град на духови по турската воена инвазија на островот пред неколку децении.
Вароша (грчки: Βαρώσια) или Мараш (турски: Maraş, некогаш се среќава и како Kapalı Maraş) е сместен во јужниот дел на крајбрежната месност Фамагуста (на турски Газимагуса) на островот Кипар. Пред Турската инвазија на Кипар во 1974, Вароша била модерна туристичка населба во градот и имала околу 39.000. По инвазијата сите мештани пребегнале и населбата останала напуштена и под контрола на Турските вооружени сили.
Кипар во 1974 година беше поделен на два дела меѓу Турција и Грција. Оттогаш Вароша е „ничија земја“, иако де факто е дел од самопрогласената Турска Република Северен Кипар. Влезот во овој град кој некогаш привлекувал туристи од целиот свет, е забранет речиси половина век.
Премиерот на Северен Кипар, Ерсин Татар, ги соопшти плановите за одново отворање на градот кој некогаш имал сместувачки капацитети од 12.000 хотелски соби.
„Во моментов сме многу блиску до реализирање на плановите за одново отворање на градот“, рече Татар.
Тој додаде дека мора да се донесат дополнителни прописи и дека можно е одложување на плановите бидејќи следат избори. Татар сепак останува оптимист.
„По мое мислење, сѐ е подготвено. Климата се смени и свртивме нова страница. Овој град му припаѓа на Северен Кипар и никој не може да ни го земе“, рече тој.
Татар не кажа конкретен датум за отворањето на Вароша.
