Ракометната репрезентација на Македонија го победи Исланд 30:25 (15:13) во третото квалификациско коло, во Групата 4 за пласман на Европското првенство. Македонија по три одиграни натпревари има две победи и еден пораз, колку што има и Украина, а Исланд и Чешка имаат по една победа и два порази.
Раул Гонзалес во само неколку дена успеа да имплементира дел од својата ракометна филозофија во играта на македонската репрезентација.
Иако, македонските играчи бавно го започнаа натпреварот, му дозволија на Исланд да поведе со 0:2 во првите 2 минути, многу бргу Ристовски, Талески и Лазаров, направија пресврт и во 7. минута Македонија водеше 4:2.
Во овој период капитенот Лазаров и Талески постигнаа по два гола, а повратникот на голот на репрезентацијата Ристовски имаше четири одбрани.
Тактичко изнендување за Исланѓаните беше и тоа што Кире Лазаров играше во двата правци, а поради тоа Митков започна на позицијата десно крило наместо стандардниот Георгиевски.
Блескаво првото полувреме имаше капитенот Лазаров, кој постигна осум голови со 100 настотна реализиација, додека Ристовски имаше шест одбрани.
Исланд го предводеше ветеранот Сигурдсон со пет голови.
Македонија до победата ја предводеа капитенот Лазаров со 10, односно Талески со пет голови и Ристовски со 12 одбрани.
Овие две репрезентации ќе го одиграат реваншот во Рејкјавик во недела во 19:45 часот.