Најдобриот македонски ракометар на сите времиња, Кирил Лазаров, остави пишан бележник на својата блескава кариера, промовирајќи ја својата автобиографија под наслов „Секогаш на победа“.
На свечената промоција синоќа во скопскиот хотел „Александар Палас“, најдобриот стрелец во историјата на Лигата на шампиони и светски рекордер според многу параметри ја претстави својата ракометна приказна од родното Свети Николе до француски Нант пред присутните гости од кремот на македонскиот ракомет, но и воопшто од македонската сцена. Беа присутни и актуелните репрезентативци.
„Сум имал трема на спортски натпревари, но сега имам уште поголема, бидејќи сум прв македонски спортист кој одлучил искрено и со многу страст да напише автобиографија“, изјави на промоцијата македонскиот репрезентативец и актуелен селектор на националниот тим, Лазаров.
„Треба да имате храброст и многу сила да кажете некои работи што не се кажани. Сите Македонци за мене знаат многу, но во ова книга ќе прочитате многу работи и што не сте ги знаеле. Ја подготвувавме седум-осум месеци со новинарот Жика Богдановиќ и во ниеден момент не се премислив да сменам нешто суштински, стојам зад сè што сум напишал. Сметам дека книгата ќе биде интересна за сите, особено за младите“, рече Лазаров.
Во својата импозантна кариера, 41-годишниот Лазаров има освоено 1 титула во Лигата на шампионите, 3 шампионски титули во Шпанија, 5 во Унгарија, а има и вредни индивидуални признанија како најдобар стрелец на Светското првенство во 2009 година, на ЕУРО во 2012, а сè уште важи за најдобар голгетер во историјата на Лигата на шампионите.
Автобиографијата чини 499 денари.
Од март оваа година Кире Лазаров стана заштитно лице на Видеолотарија Касинос Австрија.
