Само една недела откако беше отпуштен од тренерската позиција во Фулам, италијанскиот стратег Клаудио Раниери си најде нов ангажман. Рома го назначи Раниери за нов тренер на првиот тим, а тој ќе го замени неодамна разрешениот Еузебио Ди Франческо.
Разочарувачката сезона на Рома во Серија А и Лигата на шампионите го чинеше Еузебио Ди Франческо отказ. Рома остана незадоволна од тренерот, кој минатото лето доби засилувања во вкупна вредност од 130 милиони евра, но на три месеци пред крај на сезоната остана да се бори само за четвртото место на табелата во Серија А, притоа испаѓајќи од Купот на Италија и ЛШ.
Поранешниот тренер на Лестер и Фулам, Клаудио Раниери, ја презема тренерската функција и ќе почне да го води тимот на Рома веќе од наредниот понеделнк, кога „римската волчица“ го пречекува тимот на Емполи.
„Кога Рома ќе те повика, не можеш да одбиеш. Пресреќен сум што се враќам дома“, изјави Раниери по назначувањето.
Главната цел на Раниери е да обезбеди настап на Рома во Лигата на шампионите следната сезона, а за да го направи тоа ќе треба да се пласира на некое од четирите највисоки места на табелата во Серија А.