Викендов се раширија гласини дека Јирген Клоп е презаситен од фудбал и дека ќе си замине од Ливерпул за да направи пауза откако тимот запиша трет пораз во низа.
Германскиот страгег ги отфрли ваквите тврдења инсистирајќи дека не му е потребна никаква пауза.
Ливерпул сезонава не е на ниво. Во саботата додаде нов пораз кога на гостувањето во Лестер загуби од домаќинот со 3:1 иако до 78. минута водеше 0:1. Така, „Црвените“ сега имаат 13 бодови заостанување зад лидерот Манчестер Сити, се во серија од три порази по ред, а го доживеаја шестиот пораз сезонава.
Откако медиумите на Островот почнаа да пишуваат за наводното заминување на Клоп, група навивачи поставија банер пред „Енфилд“ со поддршка за Германецот.
„Слушнав и за гласините и за банерот. Банерот е убав гест, нормално. Но, не е потребен. Не ми треба некаква посебна поддршка во моментов, но убаво е, навистина убав гест“, вели Клоп.
„Дали ме отпуштиле или самиот ќе си одам? Ниту едното, ниту другото. Не ми е потребна пауза“, вели тој.
Дел од гласините беа и дека лошите резултати се поради периодот низ кој поминува Клоп, односно дека неодамна почина неговата мајка Елизабет.
„Последното нешто кое би сакал да го направам е да зборувам за лични работи. Сите знаат дека имавме лош период, но секогаш се справуваме како семејство, 100 посто. Како тренер работам веќе 20 години и можам да ги разделам тие нешта. Личното го исклучувам, не носам такви работи со мене. Ако сум на работа, тогаш работам“, рече Јирген во манир на вистински Германец.