Стратегот на Ливерпул ја одбрани наградата на ФИФА за најдобар тренер освојувајќи ја втора година по ред.
ФИФА вечерва ги прогласува најдобрите, а во категоријата тренер на годината финалисти беа Јирген Клоп, Марсело Биелса и Ханси Флик.
Клоп освои најмногу комбинирани гласови од навивачи, новинари, селектори и репрезентативни капитени. Тој годинава на Ливерпул му ја донесе првата титула во Премиер лигата по пауза од цели 30 години.
„Шокиран сум. Чекав да ме вклучите бидејќи мислев ме викате затоа што победив лани. Тука сум со моите играчи. Ви благодарам многу“, рече Клоп обраќајќи се преку видео-врска.
„Има многу луѓе на кои треба да им се заблагодарам, но најмногу на моите асистенти. Да знаев дека сум победил ќе ги соберев тука и моите асистенти. Она кое го направивме минатата сезона е само поради нив“.