Ливерпул синоќа одигра без голови на реваншот со Реал Мадрид и не успеа да ја надокнади негативата. Според германскиот стратег, елиминацијата е поради потфрлувањето на првиот натпревар.
Кралскиот клуб со 3:1 славеше на првиот натпревар во Мадрид, разлика која „Црвените“ синоќа не успеаја ни да ја начнат, а камо ли да ја надокнадат.
Ливерпул не постигна ниту еден гол иако имаше шанси, но нападот едноставно не беше на висина на задачата.
„Лошата завршница на шансите некако е наш заштитен знак сезонава. Имавме куп натпревари кои требаше да ги победиме. Знаеме колку пати Мо Салах постигнувал гол со затворени очи. Но, тоа не беше случај сега“, вели Јирген Клоп.
Тој е задоволен од играта на неговите избраници, но не и од заврпницата во нападот.
„Играта, генерално, беше добра. Одигравме доста добро и имавме одлични шанси на почетокот од натпреварот. Да искористевме барем една, ќе го отворевме натпреварот. Но, треба да се користат овие клучни моменти. Дали и кога не е важно. Не дадовме гол и потоа искуството на Реал Мадрид си го направи своето. Не го загубивме двобојот сега, го загубивме во Мадрид“, смета тој.
Ливерпул испадна од Лигата на шампионите, а ризикува наредната сезона да не игра во ова натпреварување. Во Премиер лигата е на 6. место и се бори да се најде помеѓу првите четири. По лошата серија, сега имаат три победи во низа.
„Испаѓањето нема негативно да ни влијае. Го обожаваме ова натпреварување и поради најразлични причини е многу важно за овој клуб“, заврши германскиот стратег.