Јирген Клоп ја убедува спортската јавност дека е многу рано за преговори за нов договор со Ливерпул. Германскиот стратег има уште три години од актуелниот договор, што значи дека е врзан за Енфилд до 2022 година.
Германецот го донесе славниот англиски клуб до титулата првак на Европа минатата сезона и беа втори во Премиер лигата, зад фантастичниот и недостижен Манчестер Сити.
На Клоп не му се брза, но навивачите поинаку ја сфатија неговата порака. Тие се плашат дека нивниот клуб може да остане без исклучителниот стручњак. Клоп побрза да ги смири.
„Нема да го напуштам Ливерпул до истекувањето на договорот. Тоа можам да ви го ветам. Затоа договорот е од исклучителна важност“, рече Клоп на прес-конференцијата пред пријателскиот натпревар против неговиот поранешен клуб Борусија Дортмунд.
„Имаме доволно време за таа одлука. Не се брзаме. Ми остануваат три години, прерано е за да стравувам. Тоа е само договор“, уверува Клоп.
Ливерпул изгуби само еден натпревар минатата сезона во првенството, собра 97 бодови, но тоа не беше доволно за титулата што ја чека од 1990 година.
„Целосно сум фокусиран на Ливерпул. Целосно“, заклучи Клоп.