Само две победи го делат германскиот стратег од триумф во Премиер лигата со Ливерпул, но и за тие ќе треба фудбалерите да ги испотат дресовите.
„Знаеме дека сме блиску, но блиску сепак не значи дека сме таму. Има уште 27 бодови во игра и ќе се обидеме да ги освоиме сите. Сѐ уште не сме шампиони. Треба да играме уште натпревари и да победуваме“, вели Клоп во интервју за BBC Sport.
На Ливерпул му се потребни само две победи во последните 9 натпревари за да ја освои титулата. Нормално, „Црвените“ ќе се обидат тоа да го направат уште во првите две кола против Евертон и Кристал Палас, но Клоп смета дека дури и при такво сценарио не смее да има опуштање.
„Не сакаме да престанеме да победуваме по два натпревара, или како и да е. Не гледам резултати напишани во ѕвездите, мора да работиме напорно“, смета Германецот.
Поради специфичните околности, прославата на долгоочекуваната титула, прва по онаа во сезоната 1989/90, многу веројатно нема да биде „нормална“.
„Доколку станеме шампиони, каква прослава и да е возможна, ќе ја направиме како тим, но интерно, а со нашите навивачи ќе прославиме во моментот кога тоа ќе ни биде дозволено“.