Предводникот на актуелниот премиерлигашки шампион не е многу среќен што Томас Тухел ќе му биде нов противник на Островот.
Тухел застана на кормилото на Челси откако клубот му врачи отказ на Френк Лампард. Високо мислење за него има неговиот сонародник Јирген Клоп, кој го предводи Ливерпул.
„Ова е одлична можност за Томас. За наша жалост, тој е навистина добар стратег. Го познавам веќе долго време и имам голема почит за него. Овој тим на Челси е како подарок и сигурен сум дека и Томас го гледа како таков. Ќе бидат добри“, вели Клоп.
„Челси заврпи одлична работа на трансфер пазарот летоска, донесе некои навистина добри играчи, а за такви работи потребно е време. Френк Лампард ја загуби работата, навистина е сурова таквата одлука. Очигледно е дека г-дин Абрамович дава пари и играчи, но не е најстрпливиот човек на светот“.
новинарите го запрашаа Клоп дали има некој совет за Тухел кој прв пат е во Премиер лигата.
„Нема јавно да му делам совети на Томас! Не сум сигурен кога треба да играме со нив, а и го немам неговиот број па не можам ниту порака да му пратам. Долго беше во Франција и никогаш не го добив неговиот француски број. Нема потреба да го советувам“, одби тој.
Ја коментираше и ситуацијата со Челси, клуб кој стана познат по честото менување на тренери.
„Колку тренери смени Челси во последните 10 или 15 години? Навистина многу. Таму си или успешен или те бркаат, таква им е мантрата, а јас немам ништо со тоа. Ми се посреќи со клубовите кои ги водев, секогаш. Само три се, но имав среќа. Во Маинц сите сакаа да успеам, во Дортмунд беше исто, а така е и во Ливерпул. Зошто добивав време? Затоа што сопствениците, претседателите, спортските директори мислеа дека сме на правилниот пат и знаеја дека за тоа е потребно време“.
„Френк ќе биде добро. Ако фудбалските познавачи добро го пратеа Челси минатава година, знаат дека имаше добар план. Тој е млад тренер и направи навистина добра работа. Ќе се врати брзо, ако сака, и ќе добие време“.