Ливерпул, 29 август 2019 (МИА) – Јирген Клоп очекува тешка борба на Ливерпул во обидот тимот да ја одбрани титулата во Лигата на шампионите. Германецот денес во 18 часот ќе ги дознае неговите ривали во групната фаза, но какви и да се, тој е сигурен дека ќе биде исклучително тешко и шансите се рамномерни.
– Посакувам да успееме повторно да се пласираме во финалето, но не сум сигурен дали тоа е можно и ова сезона. Имаме еднаква шанса со сите останати, но за мене е тешко да го видам тоа. Англиските екипи може повторно да доминираат, но има и многу други клубови со шанса за трофеј, изјави Германецот, кој го освои финалето во Мадрид против Тотенхем во мај.
Ливерпул се наоѓа во првиот шешир со Челси, Барселона, Манчестер Сити, Јувентус, Баерн, ПСЖ и Зенит. Во вториот се екипи како Реал Мадрид, Атлетико, поранешната екипа на стратегот Борусија Дортмунд и други.
– Мислам дека досега немало посилен втор шешир. Ова е целосно лудило. Овие тимови се за првиот. Луѓето мислат за создавање Супер лига, но таа е пред наши очи. Тоа е. А пак од четвртиот може да ни се падне Лајпциг. Погледнете го составот на Борусија Дортмунд и искрено кажете ми дека сме посилни од нив. Едноставно е неверојатно. Има многу екипи со квалитет и длабочина. Јувентус е таму, ПСЖ е таму, а дали мислите и дека Реал Мадрид се откажал? Баерн, од друга страна, ги привлече Иван Перишиќ и Филипе Кутињо, што е голем удар, заврши Клоп.