Штип, 9 Јули 2018 (МИА) - „Саркофаг“ од Исак Хаџи и „Стихови на една Водолија“ од Жарко Миличевиќ се двете нови книги поезија кои денеска беа промовирани во штипската Библиотека „Гоце Делчев“. Авторите стиховите ги напишале додека ја издржуваат својата казна затвор во Казено поправниот дом Затвор-Штип.
Жарко Миличевиќ вели дека во неговата книга можат да се прочитаат личните ставови за животот, раѓањето, смртта, но и неговите идеи.
- Напишана е во затворската установа во Штип, во рок од два до три месеца, додека доаѓа инспирацијата, така и пишуваме на хартија. Мотивот беше личниот катарзис, преку кој што поминував последните неколку месеци и години. Инспирацијата беше и смртта на мајка ми, грешката во животот, вели Миличевиќ.
Првите стихови ги напишал во шесто одделение, а ова му е прва издадена книга. Директорот на Затвор-Штип, Мики Тодоров вели дека идејата да се издадат стихозбирките на осудените лица Исак Хаџи и на Жарко Миличевиќ настанала откако во нивната установа своите дела ги промовирал познатиот писател и драматург Трајче Кацаров, кој им дал и поддршка.
- Наша цел е поттикнување на осудените лица во потешкиот период од животот, односно издржување на казната затвор да ја усмерат својата енергија во позитивен и креативен правец. Целта е ресоцијализација на осудените лица и со тоа да го намалиме повратништвото во затворите, вели Тодоров.
Промотор на двете стихозбирки напишани од осуденици Хаџи и Милчевиќ беше Трајче Кацаров.
